Gjaldfrjálsar skólamáltíðir í Fjarðabyggð
Bæjarráð Fjarðabyggðar hefur staðfest að frá upphafi þessa skólaárs greiði sveitarfélagið að fullu niður máltíðir fyrir börn í grunn- og leikskólum sveitarfélagsins. Forseti bæjarstjórnar fagnar því að mikilvægt mál sé í höfn en fulltrúi Sjálfstæðisflokksins hefði viljað forgangsraða öðruvísi.Gjaldfrjálsar skólamáltíðir voru hitamál fyrir sveitarstjórnarkosningarnar 2018 og rötuðu inn í málefnaskrá meirihluta Framsóknarflokks og Fjarðalista. Verðskráin hefur verið lækkuð í áföngum á kjörtímabilinu og á fundi bæjarráðs í síðustu viku var samþykkt ný gjaldskrá sem þýðir að skólamáltíðir grunn- og leikskólabarna verða gjaldfrjálsar.
„Það er gríðarlega mikilvægt skref til að geta boðið öllum börnum upp hollan mat óháð efnahag foreldra, auk þess að spara barnafólki talsverðar upphæðir á hverju ári. Ég er virkilega ánægð með að þetta mál sé í höfn.
Í málefnasamningi meirihluta Fjarðalista og Framsóknarflokks eru skýrar áherslur á velferð og málefni fjölskyldna í Fjarðabyggð,“ segir Eydís Ásbjörnsdóttir, forseti bæjarstjórnar Fjarðabyggðar og oddviti Fjarðalistans.
Ragnar Sigurðsson, fulltrúi Sjálfstæðisflokksins í bæjarráði, greiddi atkvæði gegn samþykktinni, eins og flokkurinn hefur gert allt kjörtímabilið. Í samtali við Austurfrétt sagði Ragnar að framboðið hefði strax árið 2018 varað við óvissu í efnahagsmálum, vegna aukinnar verðbólgu og fiskveiða.
„Við erum enn sömu skoðunar og teljum mikilvægt að hlúð verði að rekstri sveitarfélagsins og komið verði í veg fyrir frekari lántökur áður en sífellt sé bætt í útgjaldaauka. Jafnframt teljum við brýnna að stefna að almennari aðgerðum í lækkun gjaldskráa og þá er einsýnt að lækkun á meðal annars álagningarstuðli fasteignagjalda og vatnsgjaldinu mun gagnast öllum samfélagshópum,“ segir hann.
Ragnar segir niðurgreiðsluna þýða 100 milljóna útgjaldaaukningu á ársgrundvelli, samanborið við 2018. Eydís segir hins vegar að samkvæmt bókhaldi sveitarfélagsins hafi máltíðin kostað 450 krónur árið 2018 og tekjur af skólamáltíðum veturinn 2017-18 verið áætlaðar um 62 milljónir. Lækkunin nú er þriðjungur af því eða 20,7 milljónir.