Búið að tryggja heimild fyrir innheimtu bílastæðagjalda
Fréttir • This email address is being protected from spambots. You need JavaScript enabled to view it. • Fyrst birt 11. jún 2024 15:18 • Uppfært 11. jún 2024 15:24
Isavia Innanlandsflugvellir hefur tryggt heimild sína til að innheimta stöðugjöld af bílum sem lagt er við flugvöllinn á Egilsstöðum. Gjaldtakan hefst í næstu viku.
Isavia Innanlandsflugvellir tilkynnti eftir áramót um áform um gjaldtöku. Þeim var þá frestað eftir mótmæli en auglýst á ný í lok maí að gjaldtakan hæfist 18. júní við flugvellina á Egilsstöðum, Akureyri og í Reykjavík.
Því hefur aftur verið mótmælt og jafnvel efast um lögmæti þeirra. Fyrir fundi sveitarstjórnar Múlaþings á morgun liggur lögfræðiálit þar sem efast er um lögmæti gjaldheimtunnar, meðal annars á þeim forsendum að Isavia Innanlandsflugvelli skorti heimild þar sem landið er í eigu ríkisins.
Á því atriði hefur verið tekið miðað við svar fyrirtækisins við fyrirspurn Austurfréttar um lögmæti gjaldheimtunnar. Þar segir að nýr þjónustusamningur hafi verið gerður við það um rekstur innanlandsflugvalla í síðustu viku, fimmtudaginn 6. júní.
Í þeim samningi er Isavia Innanlandsflugvöllum gefin heimild til að leggja á og innheimta gjald fyrir notkun á bílastæðum við flugvelli.
Í svarinu segir að gjaldinu fari óskert til reksturs og uppbyggingar bílastæða flugvallanna. Það verði nýtt til að bæta þau, lagfæra og tryggja viðhald þeirra.
