Beint flug milli Egilsstaða og Frankfurt á næsta ári
Fréttir • This email address is being protected from spambots. You need JavaScript enabled to view it. • Fyrst birt 13. júl 2022 10:15 • Uppfært 13. júl 2022 10:29
Þýska flugfélagið Condor mun frá maí fram í október fljúga vikulega milli Frankfurt í Þýskalandi og Egilsstaða. Aðstandendur flugsins vonast til að það gefi vísbendingu til framtíðar um möguleika millilandaflugs um Egilsstaðaflugvöll yfir sumarmánuðina.
Condor er þriðja stærsta flugfélag Þýskalands og flytur um níu milljónir farþega. Það er stofnað árið 1956, var tekið yfir af þýska ríkinu í kjölfar gjaldþrots móðurfélagsins Thomas Cook árið 2019 en komst í hendur nýrra eigenda, Attestor, árið 2021.
Flugvöllurinn í Frankfurt er stærsti tengiflugvöllur Þýskalands og einn af þeim stærstu í Evrópu. Þannig eru þar bæði höfuðstöðvar Condor og Lufthansa, sem flýgur þaðan til 195 flugvalla í heiminum.
Í um 200 km radíus frá flugvellinum í Frankfurt búa um 38 milljónir manna, eða um 46% þýsku þjóðarinnar. Er þar meiri fjöldi en á upptökusvæðum flestra annarra flugvalla í Evrópu.
Þýskir ferðamenn hafa löngum verið meðal þeirra sem lengst dvelja og mest sækja Austurland. Þarlendar ferðaskrifstofur hafa þegar sýnt áhuga á fyrirhuguðu Egilsstaðaflugi Condor.
Alþjóðlegt áætlunarflug um Egilsstaðaflugvöll var síðast farið sumarið 2016 á vegum bresku ferðaskrifstofunnar Discover the World til Lundúna.
