Sparisjóður Norðfjarðar verður að Sparisjóði Austurlands
Fréttir • This email address is being protected from spambots. You need JavaScript enabled to view it. • Fyrst birt 15. apr 2015 09:27 • Uppfært 15. apr 2015 14:39
Aðalfundur Sparisjóðs Norðfjarðar samþykkti í gær að slíta sjóðnum og stofna nýtt hlutafélag í nafni Sparisjóðs Austurlands. Markmiðið er meðal annars að undirstrika að Austurland allt er aðalstarfssvæði sjóðsins.
Stjórn skilaði inn gögnum fyrir breytinguna í mars síðastliðnum en nýja hlutafélagið tekur við öllum réttindum og skyldum þess gamla frá og með síðustu áramótum.
Sparisjóði Norðfjarðar verður því slitið og stofnfjáreigendur eignast hlutabréf í nýja hlutafélaginu. Hlutafé þess nemur 700,9 milljónum króna og skiptist á milli stofnfjáreigenda í sömu hlutföllum og stofnfé.
Í tilkynningu segir að markmið breytinganna sé að styðja við áframhaldandi vöxt og uppbyggingu sjóðsins en hann fór í gegnum miklar hagræðingaraðgerðir árið 2012.
Forsvarsmenn sjóðsins segja rekstrarniðurstöður síðustu ár sýna að þær hafi skilað árangri. Hagnaður af rekstri sjóðsins fyrir í fyrra var 63,3 milljónir. Samkvæmt lögum var 5% eða 3,2 milljónum varið til samfélagsverkefna og skattar námu 8,7 milljónum.
Heildareignir í lok síðasta árs voru 5,6 milljarðar króna og bókfært eigið fé 700,9 milljónir. Eiginfjárhlutfall var 21,7% en Fjármálaeftirlitið gerir kröfu til sjóðsins um að það sé 16,9%.
Hreinar vaxtatekjur námi 219,5 milljónum og jukust um 13% á milli ára.
Mynd: Kristín Hávarðsdóttir
