Knattspyrna: Fjarðabyggð örugglega áfram í Borgunarbikarnum
Fjarðabyggð tryggði sig í kvöld áfram í 16-liða úrslit Borgunarbikars karla með öruggum 4-0 sigri á 3. deildarliðinu Kára frá Akranesi. Leikið var á Norðfjarðarvelli.Fjarðabyggð komst yfir þegar einungis 4. mínútur voru liðnar. Þá komst Brynjar Jónasson einn innfyrir og kláraði af öryggi. Fjarðabyggð bætti síðan við öðru marki á 29. mínútu eftir fallegt spil. Víkingur Pálmason sendi þá glæsilega sendingu fyrir markið á Ólaf Örn Eyjólfsson sem skoraði.
Ekki voru fleiri mörk skoruð í fyrri hálfleik. Káramenn gáfu Fjarðabyggð ekkert eftir þrátt fyrir að vera tveimur deildum neðar og hart var barist, samkvæmt atvikalýsingu fótbolta.net.
Á 54. mínútu fiskaði Brynjar Jónasson víti, fór sjálfur á punktinn en markvörður Kára varði vel. Fjarðabyggð bætti ekki við öðru marki fyrr en á 79. mínútu. Þá skoraði Ingvar Ásbjörn Ingvarsson og aftur var það Víkingur Pálmason sem lagði upp markið.
Fréttaritari fótbolta.net greinir frá því að þegar um tíu mínútur lifðu leiks hafi áhorfendur á vellinum komið auga á hval á hafi úti og má telja líklegt að það hafi vakið lukku. Fátt merkilegt gerðist hinsvegar inni á vellinum fyrr en á 89. mínútu, þegar Viðar Þór Sigurðsson þrumaði knettinum í markið eftir sendingu frá Martin Sindra Rosenthal og fullkomnaði öruggan 4-0 sigur Fjarðabyggðar.
32-liða úrslit Borgunarbikarsins halda áfram á morgun, en þá fara Hattarmenn til Reykjavíkur og leika gegn Pepsi-deildarliði Víkings.
