Vatnið í Neskaupstað í lagi
Ekki er lengur nauðsynlegt að sjóða vatn í Neskaupsstað. Talið er að yfirborðsvatn hafi borist í vatnsból í Fannardal í miklum rigningum á föstudag.Þetta kemur fram í tilkynningu frá sveitarfélaginu Fjarðabyggð og Heilbrigðiseftirliti Austurlands.
Sýni sem tekin voru á mánudag leiddu í ljós að fjöldi jarðvegsgerlar í neysluvatni Norðfirðinga var yfir viðmiðunarmörkun. Í framhaldinu var send út aðvörun til íbúa.
Eftir rannsóknir í gær er talið líklegast að vatnið hafi spillst vegna þess að yfirborðsvatn hafi komist í borholurnar í Fannardal. Því sé ekki lengur nauðsynlegt að sjóða vatnið.
Í tilkynningunni segir að áfram verði fylgst með stöðu mála í Fannardal og tekin sýni úr borholunum og dreifikerfi bæjarins. Íbúar verði upplýstir um þróun mála.
