Seyðisfjörður tómur til morguns
Staða rýmingar Seyðisfjarðar er enn í gildi og verður ekki metin að nýju fyrr en í fyrramálið. Þetta kemur fram í tilkynningu frá almannavörnum á Austurlandi.
Því er ljóst að íbúar Seyðisfjarðar fá ekki að fara heim í dag til að huga að eigum sínum og var þetta áréttað með sms-skilaboðum sem embættið sendi frá sér.
Fundað var í morgun með almannavarnadeild Ríkislögreglustjóra, aðgerðastjórn á Austurlandi ásamt Veðurstofunni vegna atburða á Seyðisfirði. Þar var staða metin á innviðum eins og rafmagni, vatnsveitu, fráveitu og fleiru. Hættustig er vegna aurskriða og neyðarstig almannavarna eftir atburði gærdagsins.
Aðgerðastjórn er á Egilsstöðum í björgunarsveitarhúsinu að Miðási 1. Hægt er að leita frekari upplýsinga þar ef óskað er. Næsta tilkynning verður send milli klukkan 13 og 14 í dag.
