Rafrænt umsóknarkerfi í bígerð á Vopnafirði
"Vinna við innleiðingu tímaskráningarkerfis fyrir starfsfólk sveitarfélagsins er í fullum gangi. Einnig er verið að hefja vinnu við rafrænt umsóknarkerfi á heimasíðu sveitarfélagsins, málaskrá og stjórnendamælaborð fyrir fjárhagskerfið."Þetta kemur fram í skýrslu Söru Elísabetar Svansdóttur sveitarstjóra á síðasta fundi sveitarstjórnar Vopnafjarðarhrepps.
Í skýrslunni segir m.a. að fjölþjóðleg listahátið barna er í gangi á leikskólanum og hefur skapað mikla ánægju. Einnig er verið að greina mötuneytismálin hjá sveitarfélaginu.
„Þó nokkuð er um að vera í skipulagsmálum. Auglýsingatíma vegna Þverárvirkjunar og strengs yfir Hellisheiði er lokið og hafa breytingarnar nú þegar tekið gildi. Hafist verður handa við Þverárvirkjun og strenglögn yfir Hellisheiði í vor/sumar. Auglýsingatíma vegna breytinga á deiliskipulagi hafnar er lokið og mun taka gildi í kjölfarið,“ segir í skýrslunni.
„Breytingartillaga vegna breytingu á aðalskipulagi vegna Ytri Hlíðar er í auglýsingu núna og mun taka gildi í apríl/maí. Verið er að skipuleggja íbúafundi í maí vegna endurskoðunar aðalskipulags og verndarsvæðis í byggð og verið er að vinna að fýsileikakönnun vegna sundlaugarmála hjá sveitarfélaginu.
Framkvæmdir hafa verið í Sundabúð og Miklagarði og hafinn er undirbúningur vegna nýrrar útrásar í Skálanesvík. Einnig er vinna hafin við að skipta ljósum á ljósastaurum yfir í LED. Verið er að leita tilboða í framkvæmdir sveitarfélagsins sem fyrirhugaðar eru 2021.“