„Leitum allra leiða til að taka þátt í skynsömu verkefni“
Ráðherra samgöngumála hefur falið Vegagerðinni að skoða hvort hægt sé að bæta veginn um Njarðvíkurskriður í sumar samhliða því sem farið verður í aðrar framkvæmdir á svæðinu. Ráðherrann voru í dag afhentir undirskriftalistar með nöfnum ríflega 2500 einstaklinga sem fara fram á að vegurinn til Borgarfjarðar verði bættur hið fyrsta.„Við meðtökum þessi skilaboð, við höfðum tekið eftir framtaki þessara ungu Borgfirðinga og eins hafði oddvitinn (Jakob Sigurðsson) komið í ráðuneytið til að fara yfir þær framkvæmdir sem fyrirhugaðar eru í sumar,“ segir Sigurður Ingi Jóhannsson, samgöngu- og sveitastjórnaráðherra.
Í sumar stendur til að leggja ljósleiðara og þriggja fasa rafmagn um skriðurnar yfir á bæina í Njarðvík. Bent hefur verið á að æskilegt sé að fara í úrbætur á veginum um leið til að forðast tvíverknað. Undir það tekur Sigurður Ingi.
„Ég hef lýst þeirri skoðun minni að það sé skynsamlegt að fara í veginn ef hægt er að finna fjármagn á þessu ári og bað Vegagerðina um að skoða það eftir fund minn við oddvitanum. Ef við eigum einhverja möguleika á að taka þátt í svona skynsömu verkefni munum við leita allra leiða til þess.“
Sigurður Ingi segir að áskoranirnar verði hafðar í huga þegar ný samgönguáætlun verður lögð fram á Alþingi í haust. „Það er staðreynd að Borgarfjörður eystra er sennilega síðasta byggðarlagið með yfir 100 íbúa sem ekki er með bundið slitlag. Það hlýtur að telja inn í forgangsröðunina við gerð áætlunarinnar.“
Þegar Sigurður Ingi tók á móti undirskriftalistanum frá þeim Eyþóri Stefánssyni, Óttari Kárasyni og Steinunni Káradóttur í ráðuneytinu í dag sagði hann frá því að aðstoðarmaður hans, Ingveldur Sæmundsdóttir, hefði farið veginn í sumar og deilt reynslu sinni. „Hún fór á Bræðsluna í sumar, lenti í veginum í þessum miklu rigningum og hefur lýst honum fyrir mér.“