Bygging fyrsta íbúðarhúss aldarinnar á Borgarfirði?
Sveitarstjórn Borgarfjarðarhrepps hefur samþykkt að sækja um stofnframlag til byggingar parhúss á grundvelli nýrra laga um almenar íbúðir.
Komi til þess að parhúsið verði byggt verður það fyrsta íbúðarhúsið sem byggt er í Borgarfjarðarhreppi á þessari öld og fyrsta íbúðarhúsið sem byggt verður í Bakkagerði frá því á níunda áratug síðustu aldar.
Ný lög um almenar íbúðir voru samþykkt á Alþingi í júní en þau gera ráð fyrir að stofnstyrkir verði veittir til byggingar leiguhúsnæðis. Stofnframlögin verða veitt til lögaðila sem ekki hafa hagnaðarsjónarmið að leiðarljósi.
Fjármagn til stofnstyrkjanna er ákveðið á fjálögum og mun Íbúðalánasjóður sjá um að meta umsóknirnar útfrá því á hvaða svæði er brýnust þörf fyrir leiguhúsnæði fyrir leigjendur undir tekju- og eignamörkum.
Almenna reglan er að stofnframlag ríkisins til lögaðila verði 18% af stofnvirði íbúða og stofnframlag sveitarfélaga 12%. Sveitarfélög geta þó fengið 6% aukastofnframlag til byggingar húsnæðis ef að skortur er á leiguhúsnæði og bygging íbúða hefur verið í lágmarki eða sérstök vandkvæði eru á því að fá fjármögnun á almennum markaði.
