Beltin björguðu í bílveltu á Fagradal
Kona um tvítugt slapp með minniháttar meiðsli eftir bílveltu á Fagradal í gær. Það virðist hafa orðið henni til happs að hún var með beltin spennt.Bílinn fór út af skammt frá Launá og endaði á þakinu. Konan, sem var ein í bílnum, var flutt á sjúkrahúsið í Neskaupstað til skoðunar og virðist hafa sloppið með minniháttar meiðsli.
Þær upplýsingar fengust hjá lögreglunni á Egilsstöðum að bíllinn væri gjörónýtur og mun verr hefði getað farið hefði konan ekki verið í bílbelti.
Af öðrum verkefnum lögreglunnar á Austurlandi má nefna að Norræna kom til Seyðisfjarðar í morgun og gekk afgreiðsla hennar vel.
Í dagbók lögreglunnar er sagt frá umferðarslysi þar sem ökumaðurinn var án ökuréttinda. Með honum í för var farþegi sem hafði falið ökumanninum aksturinn. Sá má búast við sekt fyrir athæfið.
