Austfirðingar duglegir við að minnka matarsóun
„Viðskiptavinir taka þessu rosalega vel og við sjáum að þeim er ekki sama,“ segir Sigurjón Magnússon, verslunarstjóri í Krónunni á Reyðarfirði, um átakið Minnkum matarsónun og mikla sölu á vörum í þeim flokki á svæðinu.
Krónan fór af stað með átakið Minnkum matarsóun fyrir tveimur árum. „Við blésum svo í alla lúðra fyrir rúmu ári – fórum í algera herferð, pöntuðum merkimiða og vitundarvakningin hófst formlega. Tilboðin eru tvíþætt, annars vegar er það kjöt sem fer á 25% afslátt þegar það nálgast síðasta söludag og daginn áður en það rennur út er það sett í frost og selt á 50% afslætti. Hins vegar eru tvö verð í gangi fyrir aðrar vörur, 99 krónur og 199 krónur. Áður fyrr fór sambærileg matvara öll á sérstakar flokkunarstöðvar og þaðan nýttar í dýrafóður aðrar vörur eins og rifnir þvottaefnispakkar beint í Sopru. Auðvitað er enn eitthvað sem við komum ekki út og fer þessa leið, en það er ekki nema brot af því sem það var áður.“
Fleiri tilboð á döfinni
Sigurjón segir viðskiptavini á svæðinu mjög ánægða með fyrirkomulagið. „Við finnum fyrir miklum og jákvæðum meðbyr allsstaðar á landinu, ekki síður á landsbyggðinni. Verslunin hér á Reyðarfirði er í einu af toppsætunum í sölu á þessum vörum miðað við aðrar verslanir sömu stærðar, sem er mjög jákvætt. Við ætlum að gera enn betur við okkar viðskiptavini í þessum málum, eitthvað sem verður tilkynnt síðar.