Nemendum í VA býðst skiptinám í Danmörku í gegnum Evrópustyrk
Verkmenntaskóli Austurlands hlaut í vor styrki til tveggja verkefna úr menntahluta Erasmus+ áætlunarinnar. Styrkurinn nýtist bæði til að senda nemendur og kennara á námskeið í Evrópu.
Annars vegar er um að ræða verkefnið Efling verknáms með evrópsku samstarfi. Þar verður nemendum og kennurum gefinn kostur á að ferðast til samstarfsaðila skólans í Evrópu.
Nemendum verður boðið upp á að fara í tveggja vikna skiptinám til Viborg í Danmörku. Kennurum býðst að fara í starfsspeglunarheimsóknir til Danmerkur, Þýskalands og Spánar. Í tilkynningu frá skólanum segir að tilgangur ferðanna sé einnig að styrkja „enn frekar tengslin við þessa samstarfsaðila VA í Evrópu með það að markmiði að auka nemendaskipti enn frekar.”
Hins vegar fær starfsfólk VA styrk til að sækja námskeið erlendis. Að þessu sinni verða sótt tvö námskeið á haustönn sem snúast um leiðir til að draga úr brottfalli.
Í tilkynningu segir að verkefnin séu liður í byggja upp öflugt Evrópusamstarf innan skólans en skólinn tekur einnig á móti evrópskum kennurum á næsta skólaári.
„Vegna aukinnar alþjóðavæðingar er afar mikilvægt að nemendur séu ekki aðeins undirbúnir fyrir frekara nám og/eða starf á Íslandi heldur einnig á alþjóðlegum markaði.
Þessi þróun setur aukar kröfur á VA sem menntastofnun sem í dag þarf að þjálfa nemendur til starfa í síbreytilegu og alþjóðlegu umhverfi 21. aldarinnar. Því er sterk alþjóðleg tenging lykilatriði í skólastarfi nútímans.“
Erasmus+ er styrkjaáætlun Evrópusambandsins fyrir mennta-, æskulýðs- og æskulýðsmál. Áætlunin gildir árin 2013-2020 á hennar vegum er veittir 14,7 milljarðar evra í styrki. Styrkurinn sem VA fékk er rúmar 32.000 evrur eða 3,65 milljónir króna á gengi dagsins.
