Í fréttablaði Austfirðinga er þessa vikuna m.a. fjallað um þær breytingar sem í vændum eru hjá Sambandi sveitarfélaga á Austurlandi, en aðalfundur samtakanna stendur nú á Seyðsfirði. Skoðað er hvað Vísindagarðurinn snýst um, sagt frá nýrri bók sem gefin var út í tilefni af sjötíu og fimm ára afmæli Vilhjálms Einarssonar silfurmanns og birtar fleiri spurningar til bæjarstjórnar Fljótsdalshéraðs um aðskiljanleg málefni. Austurglugginn fæst á betri blaðsölustöðum.
Nú er haustið að ganga í garð og ef ekki á að verða mjög harður vetur í þjóðfélaginu þá þarf stórhuga aðgerðir. Nú fer Icesave-málum vonandi að linna svo hægt verði að fara að slá skjaldborg um heimilin og fyrirtækin í landinu, svo notaðir séu þekktir frasar. Það er þannig að ef ekki fara að sjást stórtækar aðgerðir verður bylting í þessu landi, mun meiri og öfgafyllri en sú sem átti sér stað fyrr á árinu.
Á stjórnarfundi AFLs Starfsgreinafélags, sem haldinn var á Neskaupstað í gærkvöldi, samþykkti stjórn félagsins eftirfarandi ályktun. Í henni eru útboð á þjónustu og uppsagnir á starfsfólki ríkisstofnana til þess eins að ,,einkavæða" störf þeirra, gagnrýnd.
Samband sveitarfélaga á Austurlandi heldur 43. aðalfund sinn á Seyðisfirði á morgun og laugardag. Helstu viðfangsefni fundarins eru væntanlegar breytingar á starfi sambandsins og sóknaráætlun fyrir Austurland. Sjá meðfylgjandi dagskrá.
Á morgun verður vígður nýr skáli Ferðafélags Fljótsdalshéraðs í Loðmundarfirði. Skálinn er í landi Klyppstaðar skammt utan við kirkjuna þar sem hjáleiga var fyrrum. Ferðafélagið reisti skálann í júlí í sumar og hafa ferðamenn getað gist í honum frá ágústbyrjun. Loðmundarfjarðarskálinn er þriðji skáli félagsins á Víknaslóðum, en hinir tveir standa í Húsavík og Breiðuvík. Ferðafélagið fagnar 40 ára afmæli sínu í ár og verður því fagnað samhliða vígslu skálans um kl. 14:00 á morgun. Allir eru velkomnir.
Nú eru einungis þrír dagar eftir af hreindýraveiðitímabilnu. Þessa helgi ber vel í veiði því veður er með eindæmum gott á Austurlandi og margir veiðihópar á ferð. Tekist hefur að veiða allt eða svo til allt upp í kvóta á svæðum 3 og 5, eitthvað er eftir af kúm á svæði 1-2 og meira á svæðum þegar sunnar dregur. Forvitnilegt verður að sjá hvort náðst hefur að veiða upp í kvóta ársins, 1333 dýr, þegar niðurstöður liggja fyrir um miðja viku.
Nýsköpunarmiðstöð Íslands hefur opnað starfsstöð í Miðvangi 2 - 4 á Egilsstöðum sem ætlað er að efla nýsköpun og styðja við atvinnulíf allt frá Vopnafirði til Djúpavogs. Í tilefni af því verður opið hús í Kaffihúsinu á Eskifirði 29. september frá kl 12:00 - 13:30 þar sem kynnt verður starfsemi Nýsköpunarmiðstöðvar.
Í Austurglugga vikunnar er m.a. fjallað um nýtt tilraunaeldhús fyrir austfirskar náttúruafurðir, sagt frá hinni litríku Kjuregei Alexöndru Argunovu sem Erla Vilhjálmsdóttir bauð austur og Páll Pálsson skrifar um persónuníð fyrr á öldum. Sendiherra Rússa á Íslandi ræðir um stöðu lánamála gagnvart Íslendingum og um heimsókn sína til Austurlands. Sigurður Ingólfsson skrifar ritdóm um nýja ljóðabók Sveins Snorra Sveinssonar og framhaldssagan af Jónsa fréttaritara er á sínum stað. Þeir sem ekki eru þegar áskrifendur að Austurglugganum eru beðnir um að skrá sig undir flipanum hér að ofan; Hafa samband - ritstjóri eða hringja í síma 477-1750. Austurglugginn fæst á betri blaðsölustöðum.
Í Austurglugga þessarar viku er að vanda farið vítt um sviðið. Fjallað er auk frétta um sextíu ára afmæli Möðrudalskirkju, tíu ára feril Magna Ásgeirssonar með Á Móti Sól og um leiðir fyrir fullorðna til að hefja nám að nýju og sigrast á námsfælni. Ný framhaldssaga fyrir krakka hefur göngu sína og verður birtur nýr kafli næstu átta vikur. Athugið að í frétt um stjórn Nýja Kaupþings misritaðist föðurnafn Helgu, bæjarstýru Fjarðarbyggðar, en hún er að sjálfsögðu Jónsdóttir. Beðist er velvirðingar.