Seyðisfjörður lýstur upp með listaverkum – Myndir
Listahátíðin List í ljósi fór fram á Seyðisfirði í þriðja sinn um síðustu helgi. Hátíðin er haldin þá helgi sem fyrst sést til sólar á ný á Seyðisfirði síðan seint í október. Eins og nafnið ber með sér gengur hátíðin út á listaverk sem byggja á lýsingu.Þannig var gerður foss fram af brúnni yfir Fjarðará sem lýstur var upp í bleikum lit og á Bláu kirkjuna var varpað hreyfimynd af fossi.
Annars staðar í bænum mátti finna strandarstemmingu, vídeólistaverki sem minnti á sól var varpað á trampólín sem sett hafði verið upp fyrir ofan Lónið og þar við voru spiluð hljóð og komið fyrir hlutum til að skapa sólstrandarstemmingu.
Á blettinum utan við Tónlistarskólann hafði þessari upplýstu hænu verið komið fyrir. Forvitnir gátu skyggnst inn í hana og komu þá auga á egg.
Við Gömlu bókabúðina mátti finna listaverk sem ilm lagði frá. Á bakvið skyggða glugga sat ilmsmiðurinn Philippe Clause, fylgdist með forvitnu fólkinu og gæddi sér á flatböku ásamt félaga sínum.
