Listamenn á Breiðdalsvík koma úr felum
Sýning á málverkum og teikningum eftir Breiðdælinga opnar í Breiðdalssetri um helgina.
„Við höfum verið með sambærilegar sýningar undanfarin tvö ár hér í Gamla kaupfélaginu á Breiðdalsvík, í fyrra var þemað útskurður og þar áður útsaumur og önnur slík handavinna,“ segir Arna Silja Jóhannsdóttir, starfsmaður Breiðdalsseturs, sem staðsett er í Gamla kaupfélaginu á Breiðdalsvík.
Arna Silja segir sýningar sem þessar vera lið í því að tengja heimafólk og sýna hvað í því býr. „Það er kominn bunki af verkum inn á borð til mín, en ég myndi helst vilja fá enn fleiri. Myndirnar koma úr öllum áttum og það kemur mér skemmtilega á óvart hve marga frábæra listamenn við eigum hérna á Breiðdalsvík sem hafa verið í felum hingað til.“
Sýningin opnar á sunnudag og stendur yfir í tvær vikur.
„Sýningarnar hafa vakið mikla lukku, sérstaklega hjá heimafólki sem þekkir listamennina. Ég vil endilega hvetja þá Breiðdælinga sem liggja á listaverkum að koma þeim til mín,“ segir Arna Silja, en einnig má hafa samband gegnum netfangið This email address is being protected from spambots. You need JavaScript enabled to view it., eða í síma 849-0003.
