Vinasamningur í vinaviku á Vopnafirði
Vinavika Kýros, æskulýðsfélags Hofsprestakalls hófst í gær en vikan er nú haldin í fjórða sinn. Vikan hófst í gær með vinabíói en í dag var undirritaður vinasamningur við Vopnafjarðarhrepp.Það var Bárður Jónasson, oddviti, sem undirritaði samningin fyrir hönd sveitarfélagsins við alla 30 meðlimi æskulýðsfélagsins. Þorsteinn Steinsson, sveitarstjóri, opnaði www.vinavika.is í félagsheimilinu Miklagarði í dag.
Í samningnum segir meðal annars að á gildistíma hans skuli hreppurinn gæta forskeytinu „vinur“ fyrir framan nafn sveitarfélagsins svo úr verður nafnið „Vina-Vopnafjörður“ og skal það vera áberandi á vef þess. Einnig hvetur hreppurinn íbúa og starfsfólk sitt til að sýna vináttu og kærleika í verki.
Vinavikan hófst í gær með vinabíói en það sóttu um 100 gestir. Á dagskrá vikunnar er einnig blái dagurinn þar sem allir eru bláklæddir, Vinastund, Knúsdagur, Kærleiksmaraþon, Vinamessa, flugeldasýning, pítsuveisla og fleira.
Unglingarnir í æskulýðsfélaginu sjá um framkvæmdina, en vikan er þeirra hugmynd og framtak. „Með vinavikunnu sýna unglingarnir í verki hvernig hægt er að hafa áhrif á umhverfið með því að gleðja og vekja jákvæð viðhorf. Tilgangurinn er að minna á hin sönnu verðmæti; vináttuna og kærleikann, þar sem við erum öll hvött til að taka þátt með umhyggju: heilsa, vinka, brosa, hrósa, heimsækja, rétta hjálparhönd og þannig rækta jákvæð tengsl og vináttu,“ að því er segir í tilkynningu.
Vinakaka ársins er skúffukaka en boðið er til vinakökuboðs á fimmtudag í Miklagarði.
Vinavikunni lýkur með kærleiksmaraþoni sunnudaginn 20. október. Þá ganga unglingarnir í hús og bjóða fram aðstoð sína við létt heimilisverk og í safnaðarheimilinu er öllum boðið upp á vöfflur, skúffuköku, djús og kaffi, andlitsmálun fyrir börn, Vinabingó og bílaþvott – allt ókeypis.
Þá verður Vinamessa kl. 17:00 í Vopnafjarðarkirkju, þar sem unglingarnir taka virkan þátt og vikunni lýkur með pítsuveislu og flugeldasýningu.
