Nemendur og kennarar VA sýna stuðning við réttindabaráttu samkynhneigðra í Rússlandi
Nemendur og starfsfólk Verkmenntaskóla Austurlands í Neskaupstað tóku í dag þátt í alþjóðlegum mótmælum gegn lögum sem takmarka réttindi samkynhneigðra í Rússlandi. Árleg haustganga skólans var helguð réttindabaráttu þeirra.Um eitt hundrað nemendur og starfsmenn skólans mótmæltu á þennan táknræna hátt. Gangan var þrískipt: einn hópur fór í Páskahelli, annar upp að Hrafnakirkju og sá þriðji alla leið á toppinn, upp Drangaskarð. Göngurnar hafa verið liður í skólastarfi VA frá upphafi.
Nýverið voru samþykkt lög í Rússlandi sem banna meðal annars að börn séu frædd um samkynhneigð. Þetta þýðir t.d. að samkynhneigðir mega ekki leiðast eða kyssast opinberlega. Það má ekki bera tákn réttindabaráttu samkynhneigðra eða tala um réttindi fyrir samkynhneigt fólk.
Lögin hafa verið harðlega gagnrýnd á alþjóðavísu en mótmælafundir voru gegn þeim víða um heim í dag. Markmiðið er að setja þrýsting á þjóðarleiðtoga að tjá sig opinberlega um málið.
Mótmælendur telja lögin ekki eingöngu ganga gegn mannréttindasáttmálum sem Rússar eiga aðild að heldur líka ólympíusáttmálanum en vetrarleikarnir verða í Sochi á næsta ári. Þar stendur m.a. að hvers konar mismunum gegn íþróttamönnum sé bönnuð. Margir hafa áhyggjur af að lögunum verði beitt gegn samkynhneigðum keppendum og áhorfendum.
Myndir: VA
