17. júní hátíðarhöld í glaðasólskini á Egilsstöðum: Myndir
Fjöldi Héraðsmanna og gesta lögðu leið sína í Tjarnargarðinn á Egilsstöðum í dag í blíðskaparveðri til að taka þátt í hátíðarhöldum í tilefni þjóðhátíðardagsins. Agl.is mætti með myndavélina á lofti.
Eysteinn Hauksson, þjálfari knattspyrnuliðs Hattar, var kynnir dagskrárinnar. Hann ítrekaði við gesti í byrjun að verið væri að halda upp á afæli Jóns Sigurðssonar, ekki að tveir dagar væru í afmæli Jóns bróður hans eins og honum hafði eitt sinn verið talin trú um.
Fjallkonan var Jóney Jónsdóttir, kennari við Menntaskólann á Egilsstöðum. Hún las upp ljóðið Gakktu fram eftir föður sinn, Jón Einarsson, prófast í Saurbæ á Hvalfjarðarströnd.
Rótarýklúbbur Fljótsdalshéraðs afhenti Birni Ingimarssyni, bæjarstjóra, fyrsta eintakið af nýju örnefnakorti Fljótsdalshéraðs. Klúbburinn hefur undirbúið útgáfuna en kortið verður til sölu á völdum stöðum í sumar.
Skátar voru í fararbroddi skrúðgöngu og veitt voru verðlaun fyrir legósamkeppni og kassabílarall sem fóru fram í morgun og gær. Löng röð var eftir andlitsmálun.
Dagskránni lauk á sýningu fimleikadeildar Hattar en deildin heldur utan um hátíðarhöldin á Fljótsdalshéraði.
