Yfir 20% komin með bólusetningu
Yfir 20% íbúa á Austurlandi hefur nú hlotið bólusetningu gegn Covid-19 veirunni.Þetta kemur fram í tölum á bolusetning.is. 12,32% eða 1342 hafa hafið bólusetningu en 943 eða 8,66% teljast fullbólusett.
Alls eru þetta 20,98%. Fyrir viku var hlutfallið 18,29% og hefur því hækkað um 2,7 prósentustig.
Bólusetningar halda áfram í næstu viku. Verið er að ljúka þeim sem eru með undirliggjandi sjúkdóma áður en 60 ára og eldri verða kallaðir inn.
Samkvæmt tölum af Covid.is er enginn lengur í einangrun á Austurlandi vegna virks Covid-smits en þrír einstaklingar eru í sóttkví.
Í tilkynningu frá aðgerðastjórn almannavarnanefndar Austurlands eru íbúar hvattir til að fara varlega sem fyrr, þótt slakað hafi verið á reglum. Það skiptir ekki síst máli þegar farið er milli landssvæða þar sem fólk safnast saman, svo sem á íþróttamótum. Áfram er mikilvægt að huga að persónubundnum sóttvörnum.