Vonast til að hafa betri gögn um stöðuna síðdegis
Vera kann að rýmingu verði áfram viðhaldið á stóru svæði á Seyðisfirði undir Botnum. Enn er verið að meta líkurnar á frekari skriðuföllum á svæðinu.Þetta kemur fram í tilkynningu frá almannavörnum á Austurlandi.
Þar segir að verið sé að rýna gögn sem safnað hefur verið síðustu daga, meðal annars um stöðugleika í jarðvegi ofan við þau hús sem enn eru rýmd. Vonast er til að niðurstaða liggi fyrir síðar í dag.
Í kjölfarið verður ákveðið hve langt verði hægt að ganga í að aflétta rýmingu. Óvissa er enn til staðar og því kunni rýmingin að standa óbreytt en verði metin að nýju í fyrramálið.
Tilkynning verður send út um leið og niðurstaða liggur fyrir, eigi þó síðar en um klukkan 18.
Upplýsingafundur, ætlaður íbúum, hefst klukkan 16 og verður sendur út beint á Facebook auk þess sem hægt er að fylgjast með honum í fjöldahjálparmiðstöðunum í grunnskólanum á Egilsstöðum og félagsheimilinu Herðubreið á Seyðisfirði.