Vona að hreinsun ljúki á Seyðisfirði um miðjan mars
Vonir standa til að hreinsunarstarfi verði að mestu lokið á Seyðisfirði um miðjan marsmánuð. Lokafrágangur fari svo fram í sumar.
Þetta kom fram á stöðufundi sem haldinn var í gær með lögreglu, almannavarnadeild ríkislögreglustjóra, fulltrúum Múlaþings og fleirum auk þess sem Veðurstofa var með innlegg. Farið var yfir stöðu hreinsunarstarfs og varnargarða, rýmingaráætlana og fleira.
Á vefsíðu lögreglunnar segir að hreinsunarstarf sé í ágætum farvegi og vinna við frágang varnargarða langt komin. Stefnt er að því að kynna í upphafi hverrar viku áætlun um hreinsunarstarf þá vikuna á heimasíðu Múlaþings. Áætlunin verður einnig aðgengileg í þjónustumiðstöðinni í Herðubreið.
Vinna Veðurstofu að líkanareikningum vegna hættumats við skriðusvæðið miðar vel. Þrjú GPS tæki hafa verið sett upp í Neðri- botnum og eitt á láglendi til viðmiðunar. Þá hefur EFLA skilað frumathugunarskýrslu um svæðið við Stöðvarlæk.
Rýmingarkort hefur verið í vinnslu hjá Veðurstofu og almannavarnadeild Ríkislögreglustjóra. Vonir standa til að hægt verði að kynna kortið á íbúafundi eftir viku með leiðbeiningum fyrir íbúa og viðbragðsaðila.