Vinna við varnargarða tefst vegna bleytu
Hreinsunarstarf gengur vel á Seyðisfirði. Sökum úrkomu um helgina var ekki unnið við varnargarða í gærdag og heldur ekki í dag. Tækin sem verið er að nota eru stór og þung og því vinnst illa undan þeim á meðan jarðvegurinn er svona blautur.Þetta kemur fram í yfirliti á vefsíðu Múlaþings. Þá liggur vinna við keyrslu úr dammi við Búðará og við Slippinn einnig niðri af sömu ástæðu. Áframhald verður á neðangreindum verkefnum er líður á vikuna.
Á vefsíðunni segir að unnið er við áframhaldandi hreinsun á svæðinu þar sem Framhúsið stóð en því verki er að mestu lokið. Einnig er áframhaldandi hreinsun í Slippnum. Og unnið er við að hreinsa svæði Tækniminjasafnsins en sú vinna er að mestu búin.
Hvað bráðavarnir varðar segir að mokað hafi verið upp úr damminum í Búðaránni en akstur geymdur meðan þýðan er. Unnið er í görðunum ofan við Slippinn þegar aðstæður leyfa aftur, töluvert umframefni þar sem þarf að fjarlægja. Verið er að vinna að hönnun á svæðinu milli Fossgötu og Búðarár og ræsi undir Hafnargötu.
Lagfæringar á lækjarfarvegi ofan við Botnahlíð 33-35, og farvegi Dagmálalækjar innan við Botnahlíð 32, halda áfram þegar aðstæður leyfa.
Munahreinsun gengur mjög vel og er talsvert á undan því sem áætlað var. Vinna er í gangi við flokkun muna úr Tækniminjasafni, að því er segir á vefsíðunni.
Mynd: Ingólfur Haraldsson.