Vinna hafin í stóru skriðunni á ný
Hreinsunarstarf er aftur hafið á slóðum stóru skriðunnar sem féll á Seyðisfjörð föstudaginn 18. desember eftir hlé vegna áramóta og hlýinda. Stefnt er að því að komast í gegnum skriðuna í vikunni.Jens segir að vinnan við hreinsunina sé nú að komast í fastar skorður og þann farveg sem hún verði í næstu daga. Í stóru skriðunni eru vinnutækin komin á móts við Silfurhöllina, skrifstofuhúsnæðið sem stóð áður við Hafnargötu 28.
„Það er unnið markvisst í hreinsunarstarfi í dag. Veðrið er stöðugt, við myndum kjósa að hafa það 2-3 gráðum kaldara en jarðvegurinn er stöðugur og ekki talin nein skriðhætta,“ segir Jens Hilmarsson, vettvangsstjóri.
Verið er að hreinsa rústir Fram-húss, að Hafnargötu 6, sem eyðilagðist í flóðinu og segir Jens það ganga vel. „Við erum líka byrjuð að vinna í skriðustálinu í áttina að Tækniminjasafninu og stefnum á að reyna að komast í gengum það í vikunni.“
Vegna hlýinda í gær var ekki tekin nein áhætta með vinnu í kringum stóru skriðuna í gær. Dagurinn var þess í stað notaður til að hreinsa í hringum bensínstöðina og húsið Breiðablik sem stóð áður við Austurveg en færðist úr stað í skriðu aðfaranótt 18. desember.
„Við lukum við þá vinnu sem var áætluð í námunda við það svæði í gær, að moka það og planið við bensínstöðina gróflega.“
Daginn sem skriðurnar féllu var ekki hægt að taka bensín á Seyðisfirði því planið var fullt af aur. Þeim var hins vegar komið í stand þannig að bæjarbúar gátu tekið bensín, þótt stöðin sjálf væri á rýmingarsvæði. „Við ruddum fljótlega að bensíndælunni og tengdum hana. Við höfum lagt áherslu á að sá búnaður sem þarf til að reka bæjarfélag virki,“ segir Jens.
Í fyrstu er aðeins hreinsað gróflega en svæðin eru fínkembd í framhaldinu. Búið er að ráða starfsfólk á vegum Múlaþings til að gæta að vörslu muna sem finnast í skriðunni, í samræmi við eigendur fasteigna á hverju graftrarsvæði.
Við hreinsunina eru notuð stórar vinnuvélar og brýnir Jens við bæjarbúa að sýna tillitssemi, fara ekki inn á skriðusvæðið að óþörfu og fá leyfi hjá vettvangsstjórn þurfi þeir nauðsynlega að komast inn á það. Að sama skapi er brýnt á hverjum morgni fyrir verktökum að fara með gát og leggja vélunum þannig að þær valdi Seyðfirðingum sem minnstum óþægindum.