Vill að vetrarþjónusta á Öxi verði bætt verulega
„Sveitarstjórn Múlaþings leggur áherslu á mikilvægi þess að vetrarþjónusta á Öxi verði bætt verulega frá því sem nú er enda er um mikilvæga samgöngutengingu að ræða á milli byggðakjarna innan sveitarfélagsins.“Þetta kemur fram í tillögu sem samþykkt var samhljóða á fundi sveitarstjórnarinnar í gærdag. Á fundinum lá fyrir ósk frá heimastjórn Fljótsdalshéraðs um að sveitarstjórn Múlaþings taki upp viðræður við Samgöngu- og sveitarstjórnarráðuneytið um bætta vegþjónustu á vetrum yfir Öxi umfram þá reglu sem í gildi er.
Í tillögunni segir að einnig er vert að hafa í huga öryggisþáttinn þar sem þetta snýr einnig að aðgengi að heilbrigðisþjónustu, brunavörnum og flugsamgöngum. Það er mat sveitarstjórnar að eðlilegt sé að færa þjónustustig Axarvegar vegna vetrarþjónustu af þjónustuflokki 4 á þjónustuflokk 2.
„Jafnframt leggur sveitarstjórn Múlaþings áherslu á að útboði vegna framkvæmda við nýjan veg yfir Öxi verði hraðað þannig að framkvæmdir geti hafist á árinu eins og fyrirhugað hefur verið,“ segir í tillögunni.
„Sveitarstjóra falið að koma framangreindu á framfæri við Samgöngu- og sveitarstjórnarráðuneytið með ósk um viðræður vegna þessa sem fyrst.“
