Veiddu fyrstu loðnuna síðan 2018
Grænlenska skipið Polar Amaroq fékk 20-30 tonn af loðnu í gærkvöldi í trollhólfinu austur af landinu en það er fyrsta loðnan sem veiðist hér við land frá árinu 2018.
Þetta kemur fram á vefsíðu Síldarvinnslunnar. Þar segir að tekið var eitt hol í leiðindaveðri.
„Við prufuðum að kasta í gær rétt áður en dimmdi en veðrið var afskaplega leiðinlegt. Við leituðum síðan í nótt en það er bara ekkert veiðiveður. Við fengum um 20-30 tonn af stórri loðnu en það er töluverð áta í henni. Við munum frysta aflann um borð. Það er bullandi bræla og ég held að sé ekkert annað að gera en að leita vars,“ segir Sigurður Grétar Guðmundsson skipstjóri Polar Amaroq í samtali á vefsíðunni.
Útgefinn loðnukvóti Polar Amaroq er 1155 tonn og er það hluti af 22.000 tonna kvótaúthlutun Hafrannsóknarstofunnar frá því fyrr í vetur. Það var einmitt Polar Amaroq sem fann loðnuna sem Hafrannsókn byggði úthlutun sína á.