Varað við vatnselg við brúna yfir Jökulsá á Fjöllum
Vegagerðin varar ökumenn á ferðinni milli Norður- og Austurlands við því að vatn geti runnið yfir þjóðveginn við Jökulsá á Fjöllum. Meginleiðir á Austurlandi eru opnar en mokstursbílar eru víða á ferðinni.Samkvæmt upplýsingum frá Vegagerðinni rann vatn inn á veginn við Jökulsá á Fjöllum um tíma í gær. Það gerir það ekki núna en liggur alveg við klæðninguna.
Ástæðan er mikil klakastífla í ánni. Ekkert sé hægt að gera nema bíða og fylgjast með. Reiknað er með að 2-3 dagar líði þar til áin ryður sig.
Helstu leiðir á Austurlandi eru nú færar en fjallvegir voru ýmist þungfærir eða hreinlega ófærir um helgina. Hálka er á Möðrudalsöræfum, Fjarðarheiði, Fagradal, Vatnsskarði og meðfram ströndinni. Snjóþekja er og skafrenningur á Vopnafjarðarheiði og snjóþekja á Jökuldal.
Á fáfarnari leiðum er víðast hvar snjóþekja, en jafnvel þungfært. Unnið er að mokstri víða. Frá Djúpavogi og suður úr er greiðfært.
Hreindýr hafa sést á vappi meðfram vegum síðustu daga, hópur var á Fagradal í síðustu viku og um helgina var varað við dýrum á Völlum.
Spáð er norðan 5-13 m/s, hvassast við ströndina og éljagangi eystra í dag. Veðurstofan hvetur þá sem hyggja á langferðir, einkum til norðurs yfir fjallvegi, að kynna sér vel veðurspár áður en haldið er af stað.