Útlit fyrir rýmingu næsta sólarhringinn
Rýming verður í gildi bæði á Eskifirði og Seyðisfirði næsta sólarhringinn hið minnsta. Metið verður um klukkan ellefu í fyrramálið hvort hægt verði að hleypa íbúum heim til að huga að eigum sínum. Engra er saknað eftir skriðuföll á Seyðisfirði í dag og engin slys verið tilkynnt.Samkvæmt stöðuskýrslu almannavarna, sem send var út klukkan 21:20 í kvöld, verður rýming í gildi á báðum stöðum að minnsta kosti næsta sólarhringinn.
Skömmu fyrir klukkan þrjú í dag féll stór aurskriða úr Botnabrún, milli Búðarár og Stöðvarlækja á tíu hús. Ekki hefur verið hægt að meta tjón á staðnum. Í kjölfarið var ákveðið að rýma kaupstaðinn að fullu og öll umferð þar nú bönnuð.
Staðan verður endurmetin klukkan ellefu í fyrramálið. Í kjölfarið verður íbúum þar send tilkynning um hvort og hvernig þeir geti athugað með eignir sínar.
Ljóst er að skriðurnar hafa valdið miklu tjóni á mannvirkjum. Í tilkynningu frá Mílu segir að ekkert tjón hafi enn orðið á fjarskiptastöðvum fyrirtækisins. Í dag var unnið hörðum höndum við að dæla frá húsi sem hýsir búnað fyrirtækisins til að verja hann. Í tilkynningunni er þakkað fyrir veitta aðstoð.
Rafmagn fór af stórum hluta bæjarins eftir skriðurnar í dag. Það er sagt komið á aftur að miklu leyti en einhver hús eru enn án veiturafmangs, meðal annars tækjahús Mílu. Varafl þar dugir fram á mánudagskvöld. Ráðstafanir verða gerðar til að tryggja áframhaldandi rekstur ef rafmagnsleysi dregst lengur.
Auk viðbragðsaðila af Austurlandi hefur borist aðstoð frá Norðurlandi eystra í dag auk sérsveitar ríkislögreglustjóra.
Á Eskifirði komu í ljós að sprungur í gamla Oddsskarðsveginum höfðu stækkað. Í kjölfarið þurftu yfir 160 manns að yfirgefa heimili sín.