Toppskíðalyftan í Oddskarði ekki opnuð meira í vetur
Ljóst er að toppskíðalyftan í Oddskarði verður ekki opnuð meira í vetur. Miklar skemmdir urðu á henni í óveðri fyrir nokkru síðan.Fjallað er um málið á vefsíðu Fjarðabyggðar. Þar segir að talsvert hafi verið spurt að undanförnu um stöðu mála á topplyftunni í Oddsskarði, en eitt mastur lyftunnar skemmdist mikið í óveðri í vetur og hefur lyftan þar af leiðandi verið lokuð. Unnið hefur verið að viðgerð að undanförnu en nú er ljóst að ekki verður unnt að opna lyftuna í vetur.
„Það lá fyrir í upphafi að um talsvert miklar skemmdir var að ræða, og ljóst að fara þyrfti í mikla viðgerð á toppmastri lyftunnar sem hafði skemmst. Sjóða þarf stálbita í mastrið til að laga það, en hann þarf að koma erlendis frá. Unnið var að málinu af kappi til að reyna að hafa lyftuna klára fyrir páskavertíðina sem senn fer í hönd,“ segir á vefsíðunni.
„Því miður kom það í ljós þegar stálbitinn kom til landsins fyrir nokkru að hann hafði verið vitlaust afgreiddur, og var of lítill. Þar af leiðandi þarf að panta nýjan bita í réttri stærð, en vegna tafa á flutningum vegna COVID-19 er ljóst að það verður ekki hægt að koma honum til landins í tæka tíð. Topplyftan í Oddsskarði mun því ekki komast aftur í gagnið á yfirstandandi skíðavertíð, en hún mun verða klár fyrir þá næstu.“
Mynd: fjardabyggd.is
