Talsverð úrkoma um helgina á Austfjörðum
Um helgina er spáð allhvassri eða hvassri suðaustanátt með talsverðri rigningu Austanlands, einkum á SA-landi og sunnanverðum Austfjörðum.Þetta kemur fram á vefsíðu Veðurstofunnar. Úrkomukortið sem fylgir með þessari frétt sýnir stöðuna á hádegi á sunnudaginn samkvæmt spánni.
„Því má reikna með talsverðri hláku með auknu afrennsli og líkum á vatnavöxtum,“ segir í athugasemd veðurfræðings á vefsíðunni.
Eins og fram hefur komið í fréttum á að meta stöðuna á Seyðisfirði um helgina með það fyrir augum hvort rýma þurfi svæði í bænum að nýju.
„Af þessum sökum verður aukin ofanflóðavöktun um helgina og fylgst með því hvernig aðstæður þróast á Seyðisfirði,“ segir m.a. í frétt á Austurfrétt.is
