Stór aurflóð ekki óþekkt á Seyðisfirði
Stór aurflóð eru ekki óþekkt fyrirbrigði á Seyðisfirði en þau hafa yfirleitt fallið utar í firðinum en þau sem bæjarbúar glíma við núna.„Það varð stórt aurflóð árið 1950 við Flísahúsalæk sem kostaði fimm mannslíf og það er mannskæðasta flóðið á seinni tímum,“ segir Þorvaldur Jóhannsson fyrrum bæjarstjóri á Seyðisfirði.
„Það má einnig nefna stórt aurflóð 1975 og annað sem skall á þann 8. ágúst 1989 þegar ég var bæjarstjóri,“ segir Þorvaldur. „Þetta síðarnefnda skall á atvinnusvæðinu við útkant bæjarins og olli gífurlegu eignatjóni en engir mannskaðar urðu í þessum tveimur flóðum.“
Þorvaldur segir að vissulega sé uggur í fólki, einkum ungu fólki sem fluttst hefur til bæjarins. Eldri borgarar muna hinsvegar eftir þeim flóðum sem skullu á seinnipart síðustu aldar.
Fram kemur í máli hans að aurflóð falli sunnan megnin í firðinum en snjóflóð aftur norðan meginn. Það virðist sem flóðin séu að færa sig innar í firðinum og að þéttbýlinu.
Sjálfur býr Þorvaldur í húsi sem er á rýmingarsvæðinu og hann kemst ekki heim til sín í augnablikinu.
„Ég sit hér í golfskálanum og virði fyrir mér náttúruna,“ segir hann. „Við fengum að fara heim undir eftirliti í gærdag til að huga að eigninni en fáum það ekki í dag. Það á að athuga með það rétt fyrir hádegi á morgun hvort við fáum að fara heim og skoða aðstæður. Á meðan erum við á hótelherbergi“
Fram kemur í máli Þorvalds að enn rigni en svo virðist sem aðeins hafi dregið úr úrkomunni.
