Sömdu um rekstur Fab Lab Austurland
Verkmenntaskóli Austurlands og Fjarðabyggð, atvinnuvega- og nýsköpunarráðuneytið og mennta- og menningarmálaráðuneytið hafa undirritað samninga um rekstur Fab Lab Austurland.Þetta kemur fram á vefsíðu Fjarðabyggðar. Þar segir að eð þessum samningum verður Verkmenntaskóla Austurlands gert kleift að setja í gang starfsemi Fab Lab Austurland með sambærilegum hætti og var á árunum 2014 – 2016.
„Þetta er mikið fagnaðarefni fyrir samfélagið í Fjarðabyggð sem og á öllu Austurlandi, hvort sem horft er til almennings, frumkvöðla og fyrirtækja eða menntastofnana á svæðinu,“ segir á vefsíðunni.
Markmiðið með starfsemi Fab Lab smiðjunnar verður enn sem fyrr að auka þekkingu og leikni nemenda, kennara, almennings og innan atvinnulífs á persónumiðaðri nýsköpunarvinnu og stafrænum framleiðsluaðferðum.
Smiðjunni er einnig ætlað að styðja við þátttöku og áhuga á verk- og tækninámi í grunn- og framhaldsskólum og auka tæknilæsi, skapandi starf og frumkvöðlamennt. Markmið verkefnisins er enn fremur að skapa vettvang fyrir þróun og prófun hugmynda og efla þannig samkeppnishæfni í nærsamfélagi.
Næstu skref lúta að því að ráða verkefnisstjóra fyrir smiðjuna en í kjölfar þess verðar dyr Fab Lab Austurland opnaðar að nýju.“
