Slapp undan skriðunni á náttfötunum
„Ég rétt slapp undan skriðunni á hlaupum á náttfötunum,“ segir Sigríður Guðlaugsdóttir íbúi í húsi sem stendur rétt hjá Búðará þar sem skriðan í dag féll niður.„Ég var heppin að sleppa en ég heyrði drunurnar á undan og tókst að sleppa út. Og ég náði að grípa hundinn minn með í leiðinni. Húsið mitt stendur þó ennþá en húsið við hliðina fór niður í fjöru og er sennilega ónýtt.“
Sigríður segir að hún sé enn á náttfötunum en hafi fengið inni í nótt á Hallormsstað. „Ég fæ far inn í skóginn. Það eina sem ég tek með mér eru tveir hundar og köttur í tösku,“ segir hún.
Nýjustu fréttir eru að flestir íbúa Seyðisfjarðar hafa yfirgefið bæinn og er hann því mjög eyðilegur í augnablikinu. Nær allir hafa farið á einkabílum eða fengið far með vinum eða kunningjum. Rútur eru komnar og eru til staðar fyrir þá sem á þurfa að halda. Vakt verður í nótt og búið er að lýsa upp hlíðarnar fyrir ofan bæinn þar sem helst er talið að skriður geti fallið.
Margir á Héraði hafa boðist til að hýsa íbúa Seyðisfjarðar. Bæði Hótel Valaskjálf og Hótel Hallormsstaður hafa opnað dyr sínar fyrir Seyðisfirðingum sem og Tehúsið.
