Skemmdir á Núpi eftir páskastorm
Skemmdir urðu á íbúðarhúsi og hlöðu á bænum Núpi yst í norðanverðum Berufirði í óveðri um helgina. Rúður brotnuðu í húsinu og þakplötur fuku af hlöðunni.„Það geta orðið ægilega krappt hér í norðan- og norðvestanátt, þá myndast hnútar úr dalnum fyrir ofan,“ segir Björgvin Gunnarsson, bóndi að Núpi.
Hvessa tók á svæðinu um kvöldmat á páskadag en Björgvin segir veðrið hafa orðið hvað verst um klukkan fjögur aðfaranótt annars í páskum. Samkvæmt vindmæli á Streiti þar skammt frá mældust hviður þar upp á 40 m/s.
Á Núpi stóð vindurinn úr hánorðri og þar fuku þakplötur af hlöðunni á nýja fjósið og skemmdu það. Þá brotnuðu allar rúður á íbúðahúsinu sem snéru upp í vindinn, þar af bæði glerin í einni. Björgvin segir að vindurinn hafi náð í möl úr heimreiðinni og feykt í gluggana.
„Þetta er dálítið tjón. Það var alveg brjálað hérna, en svo var nánast logn á milli. Svona sprengjur eru það hættulegasta,“ segir hann.
Hann segist ekki óvanur því að hvasst verði við þessar kringumstæður á Núpi og hefur byggt upp húsin þar miðað við veðrin. „Þetta er mjög staðbundið hér á útströndinni. Hlaðan er eiginlega eina húsið sem er fyrir þann tíma sem ég byrjaði að byggja hér upp, ég þarf að skipta um þak á henni í sumar. Annars eru öll hús hér steypt upp, það þýðir ekkert annað.“
Í byrjun árs brast líka á með miklum norðvestan stormi en þá mældust hviður upp á 64 m/s á Streiti. „Sú veðurspá var með þeim verri sem maður hefur séð. Það var þó bara lakkið á bílunum sem skemmdist, það dugði ekki til þótt þeir væru í skjóli, það mynduðust svo miklir sviptivindar hér. Ég hef aldrei heyrt meiri hávaða í háloftunum en þá, það var stöðugur sjávarniður.“
Víðar varð hvasst aðfaranótt mánudags eystra. Um það leyti sem hvað hvassast varð á Núpi sýndi vindmælir í Hamarsfirði 67 m/s í hviðum. Sá mælir hefur stundum gefið sig í miklu hvassvirði en hann stóð af sér þennan storm.
Á Fáskrúðsfirði og Reyðarfirði voru björgunarsveitir kallaðar út til að hefta fok. Á fyrrnefnda staðnum fór vindhraðinn í rúma 40 m/s í hviðum. Þá var björgunarsveitin Vopni kölluð út að kvöldi páskadags til að sækja ökumann sem lenti í vandræðum þegar veðrið versnaði á Vopnafjarðarheiði. Honum var fylgt til Vopnafjarðar.
Myndir: Björgvin Gunnarsson