Seyðisfjörður rýmdur og neyðarstigi lýst
Almannavarnadeild ríkislögreglustjóra hefur lýst yfir neyðarstigi á Seyðisfirði og ætlunin er að rýma bæinn að fullu, það er flytja alla íbúa á brott. Allir sem staddir eru á Seyðisfirði hafa verið beðnir um að gefa sig fram í fjöldahjálparstöðinni í Herðubreið.
Verið er að skrá alla sem eru á Seyðisfirði í Herðubreið eða í gegnum símanúmerið 1717. Fólk hefur val um að yfirgefa bæinn í eigin bílum. Einnig verður boðið upp á rútuferðir og eru rútur á leiðinni. Öllum sem búa í húsum utan rýmingarsvæða býðst til þess að skjótast heim og taka með sér helstu nauðsynjar.
Eins og fram hefur komið féll stór skriða á um tug húsa um klukkan þrjú í dag. Flest þeirra skemmdust og eitt kubbaðist í sundur eins og það var orðað í frétt á austurfrétt.is. Ekki er vitað um nein meiðsli á fólki í þessari skriðu sem féll innan rýmingarsvæðis.
Allar björgunarsveitir á Austurlandi hafa verið boðaðar til Seyðisfjarðar og lögreglumenn frá lögreglunni á höfuðborgarsvæðinu, sérsveit ríkislögreglustjóra og frá lögreglunni á Norðurlandi eystra hafa einnig verið sendir á staðinn. Þá er varðskipið Þór á leið austur og verður til taks á Seyðarfirði.
Það er mikilvægt að allir íbúar og aðrir á Seyðisfirði mæti í félagsheimilið Herðubreið og gefi sig fram í fjöldahjálparstöð eða hringi í síma 1717.
Fréttin verður uppfærð...Skráningu allra íbúa er lokið.
Tekin hefur verið ákvörðun um að enginn fái að fara heim áður en bærinn verður rýmdur.