Rýmingarlína dregin eftir Múlavegi
Óverulegar líkur eru taldar á að hætta sé á skriðu úr Botnabrún sem skapað geti hættu neðan Múlavegar á Seyðisfirði.Þetta kemur fram í nýrri tilkynningu lögreglunnar á Austurland eftir að aðstæður í brúninni voru skoðaðar sérstaklega í dag.
Fólki er því heimilt að snúa heim í hús á neðri hluta Múlavegar, Túngötu og Miðtúni, eða því svæði sem er gullitað á meðfylgjandi mynd.
Rýming er á móti í gildi á þeim svæðum sem eru rauðlituð og fá íbúar á því svæði næstu upplýsingar 27. desember. Á því svæði eru göturnar Botnahlíð, Brattahlíð, Fossgata, Baugsvegur auk Hafnargötu og Austurvegar utan við gatnamótin niður Lónsleiru.
Í tilkynningu Múlaþings segir að fjöldahjálparstöð í Egilsstaðaskóla verði opin fyrri part dags á morgun en eftir það er bent á þjónustumiðstöð í Herðubreið á Seyðisfirði og á hjálparsíma Rauða krossins, 1717. Í gær og í dag hefur starfsfólk Múlaþings haft samband við Seyðfirðinga sem búa á svæðum þar sem rýmingu hefur enn ekki verið aflétt til að afla upplýsinga um aðstæður fólks á næstu dögum.
Þar sem ekki er alltaf samræmi á milli skráningar inn á fjöldahjálparstöð og skráningar í Þjóðskrá þá getur verið að einhverjir hafi orðið út undan og eru þau sem ekki hafa húsnæði á næstu dögum og búa á þessum svæðum því beðin að hafa samband við skrifstofu sveitarfélagsins í síma 4 700 700.
