Rýming á Eskifirði að minnsta kosti til hádegis
Íbúar í húsum á Eskifirði, sem rýmd voru fyrir um sólarhring, fá ekki að fara heim til sín fyrir hádegi á morgun. Gliðnun hefur haldið áfram í hlíðinni fyrir ofan í dag.Starfsmenn Veðurstofu Íslands, Vegagerðarinnar og Fjarðabyggðar hafa í dag safnað gögnum um stöðuna við Oddsskarðsveg en eftir er að vinna úr þeim til að meta stöðuna.
Í gær gliðnuðu sprungur í veginum um 10 cm og samkvæmt tilkynningu lögreglu hélt gliðnunin áfram í morgun en síðan hefur hægt á henni. Verið er að kanna hverju gliðnunin sætir en þess vegna er ekki hægt að aflétta rýmingu að sinni.
Minnt er á fjöldahjálparstöð Rauða krossins í Eskifjarðarkirkju sem opin verður til klukkan níu í kvöld og opnar aftur klukkan níu í fyrramálið. Næstu tilkynningar er að vænta um hádegisbil á morgun.
Mynd: Sverrir Albertsson