Reglugerð um grásleppu kemur í veg fyrir sama klúðrið og í fyrra
Sjávarútvegsráðherra hefur gefið út nýja reglugerð um grásleppuveiðar í ár. „Það má segja að þessi reglugerð komi í veg fyrir sam klúðrið og í fyrra,“ segir Kári Borgar Ásgrímsson sjómaður á Borgarfirði eystra og stjórnarmaður í Félagi smábátaeigenda á Austurlandi.Hin nýja reglugerð gerir m.a. ráð fyrir að leyfi til veiðanna verði gefið út til 25 samfelldra daga. Kári Borgar segir að með þessu hafi grásleppusjómenn alveg stjórn á því hvenær þeir veiða. Jafnframt er ákvæði um svæðalokanir felldar niður en þau urðu þess valdandi í fyrra að hlutur grásleppusjómanna á Austfjörðum rýrnaði verulega. Það gerðist í kjölfar þess að sjómenn vestar á landinu veiddu megnið af kvótanum framan af veiðitímabilinu.
„Þegar á heildina litið er ég sæmilega sáttur við þessa nýju reglugerð,“ segir Kári Borgar. „Að hluta girðir hún fyrir þetta ójafnrétti sem var í veiðunum á síðasta ári.“
Kári Borgar segir að þótt veiðitímabilið hefjist 23. mars n.k. eigi hann ekki von á að veiðar hefjist hér austanlands fyrr en eftir páska.
