Opnað fyrir umsóknir í Hvatasjóð Seyðisfjarðar
Í gær var opnað fyrir umsóknir í Hvatasjóð Seyðisfjarðar. Sjóðnum er ætlað að styðja við uppbyggingu atvinnulífs á staðnum eftir aurskriðurnar í desember.Sjóðurinn er eitt þeirra úrræða sem í boði eru í gegnum sérstakt átak ríkisstjórnarinnar, sem veitir 250 milljónir á næstu þremur árum til atvinnuuppbyggingar á Seyðisfirði. Opnað var fyrir umsóknir í gær og er frestur til að skila inn umsóknum til 14. apríl.
Forgang í sjóðinn eiga þeir atvinnurekendur sem urðu fyrir tjóni í hamförunum. Sjóðnum er þó einnig ætlað að stuðla að nýsköpunum með áherslu á sjálfbærni, bætta nýtingu, notkun staðbundinna hráefna og sýnilega svæðisins.
Sjóðurinn er ætlaður Seyðfirðingum og þeim sem hafa sterk tengsl við svæðið. Nánari upplýsingar um hann og umsóknareyðublað má nálgast á vef Austurbrúar.
Það var Urður Gunnarsdóttir, nýráðinn verkefnastjóri hjá Austurbrú, sem kynnti sjóðinn en hún mun halda utan um verkefnið fyrir hönd stofnunarinnar. Þá hefur verið mynduð sérstök verkefnisstjórn sem í sitja fulltrúar frá Múlaþingi, heimastjórn Seyðisfjarðar og Austurbrú.
Fleiri verkefni eru komin af stað á vegum átaksins. Þannig stendur atvinnurekendum á Seyðisfirði til boða ráðgjöf til að bregðast við vanda í kjölfar hamfaranna og skjóta stoðum undir reksturinn til framtíðar. Nauðsynleg ráðgjöf er metin í hvert skipti og getur verið lögfræðileg, rekstrarleg eða viðskiptaleg. Þá hefur trygginga- og tjónamálum verið fylgt eftir.
Eins er til skoðunar atvinnuhúsnæði til framtíðar og náms- og virkniúrræði.