Nokkuð stórt snjóflóð úr Sörlagili
Nokkuð stórt snjóflóð féll úr Sörlagili, rétt við munna Norðfjarðarganga í Fannardal, eftir klukkan níu í morgun. Krapaflóð hrifsaði með sér heyrúllur við bæinn Hjarðarhlíð innst í Skriðdal í nótt.Samkvæmt upplýsingum frá ofanflóðadeild Veðurstofu Íslands var flóðið úr Sörlagili um þrír metrar á þykkt. Snjóflóð eru þekkt af svæðinu og því eru varnargarðar ofan við veginn frá göngunum. Flóðið stoppaði nokkru fyrir ofan varnirnar.
Flóðið er skráð 3,5 að stærð á snjóflóðamælikvarðann, en flóð frá 3 og yfir eru talin nógu kröftug til að valda skemmdum á mannvirkjum. Flóðið féll eftir klukkan níu í morgun sem þykir sérstakt þar sem þá hafði dregið verulega úr úrkomunni á Austfjörðum.
Í yfirliti Veðurstofunnar kemur fram að vitað sé um snjóflóð í Fagradal, Eskifirði, Norðfirði, Seyðisfirði, Fljótsdal og Vopnafirði í gær og í dag. Þá hafa fallið krapaflóð í Fáskrúðsfirði, Reyðarfirði, Seyðisfirði og Skriðdal.
Innan bæinn Hjarðarhlíð, innst í Skriðdal, er vitað um að minnsta kosti fjögur krapaflóð í lækjarfarvegum. Eitt þeirra var nokkuð öflugt og færði til heyrúllur sem það náði í.
Enn eru að berast tilkynningar um ofanflóð á Austfjörðum. Eftir hádegið var tilkynnt um fimm krapaflóð í utanverðum Reyðarfirði, milli Helgustaða og Litlu-Breiðuvíkur.
Aurskriða féll í Borgarfirði eystra við Landsenda í nótt og grjót hrundi úr Njarðvíkurskriðum. Austan Hafnar í Hornafirði féll nokkuð stór aurskriða á rafmagnsstæðu og tók í sundur línuna sem tengist við Teigarhorn í Berufirði.
Frá skriðunni við Landsenda í Borgarfirði. Mynd: Eyþór Stefánsson
