Mikið traust til heilsugæslu á Austurlandi
Í nýrri könnun Sjúkratrygginga Íslands (SÍ) um þjónustu á heilsugæslustöðvum á landsbyggðinni kemur fram á íbúar á Austurlandi bera mikið traust til heilsugæslunnar í fjórðungnum. Eru raunar með næstmesta traustið á landsbyggðinni.Fram kemur í könnuninni að rúmlega 72% íbúa Austurlands bera „mjög mikið“ eða „fremur mikið“ traust til heilsugæslunnar. Mesta traustið er að finna á Norðurlandi eða meðal rúmlega 80% íbúa en minnsta traustið er á Suðurnesjum eða tæp 40%.
„Þegar niðurstöður eru bornar saman milli heilbrigðisstofnanna sex, Austurlands, Norðurlands, Suðurlands, Suðurnesja, Vesturlands og Vestfjarða sést sterk fylgni á milli ánægju svarenda og hversu margir eru með skráðan heimilillækni,“ segir m.a. í tilkynningu um könnunina.
Helstu niðurstöður könnunarinnar eru þær að almennt bera einstaklingar mikið traust til heilsugæslunnar á landsbyggðinni eða að jafnaði 70% aðspurðra og 69,4% eru ánægðir með þjónustuna. 85,6% svarenda töldu viðmót og framkomu starfsfólks almennt gott.
Nærri 86% sögðust hafa fengið þjónustu á heilsugæslustöð innan viku, en þó telja 49% það brýnt að stytta bið eftir þjónustu hjá heilsugæslunni. Um 39% telja mikilvægt að auðvelda aðgengi að læknum í síma og tæp 36% óska eftir að geta skráð sig á fastan heimilislækni.
Könnun var gerð af Maskínu fyrir hönd SÍ í nóvember s.l. Úrtakið var 6.000 manns. Könnunin er liður í eftirliti SÍ með þjónustunni og verkfæri fyrir bæði SÍ og heilsugæslurnar til að gera enn betur.
