Loksins hætt að rigna en skriðuhætta áfram
Það er loksins hætt að rigna á Seyðisfirði en skriðuhætta er áfram í bænum. Þetta kemur fram í hugleiðingum veðurfræðings á Veðurstofunni.Sérfræðingar Veðurstofunnar hafa fundað í morgun um stöðuna á Seyðisfirði. Verið er að greina niðurstöður úr mælingum sem gerðar voru á vatnsmagni í hlíðunum fyrir ofan bæinn.
Neyðarstig er í gangi til a.m.k. kl. 11 en þá á að endurmeta stöðuna.
Í stöðuuppfærslu á vefsíðu Veðurstofunnar segir að það dró úr úrkomu á Seyðisfirði í gærkvöldi og snérist í norðlæga átt í nótt. Lítil úrkoma hefur mælst á Austfjörðum í nótt. Spáð er úrkomulitlu veðri áfram um helgina og kólnandi á sunnudag.
Ekki hafa borist fréttir af frekari skriðuföllum á Seyðisfirði en aðstæður verða kannaðar þegar birtir. Bærinn er mannlaus en björgunarsveitarmenn og sérfræðingar fara til þess að kanna aðstæður í dag. Gerðar verða mælingar til þess að kanna hreyfingu yfirborðsjarðlaga og teknar myndir með flygildi eftir því sem aðstæður leyfa.
Sprungur sáust á gamla þjóðveginum um Oddsskarð ofan við Eskifjörð eftir hádegi í gær á tveimur svæðum ofan svæðisins sem rýmt var í gær. Hreyfing hefur verið á þessum sprungum, bæði gliðnun og sig, etv. 10 cm eða meira. Aðstæður verða kannaðar í dag.