Líkamsrækt í boði á ný á Vopnafirði
Íbúar á Vopnafirði geta stundað líkamsrækt á ný í íþróttahúsinu en húsið var opnað fyrir líkamsrækt í upphafi vikunnar.Þetta kemur fram á vefsíðu Vopnafjarðar. Þar kemur fram að ýmis skilyrði fylgja því að stunda líkamsrækt í húsinu. Þannig er nauðsynlegt að gestir panti tíma hyggist þeir nýta sér aðstöðu í líkamsrækt.
Fram kemur að sjö gestir geta æft í einu og í hámark 60 mínútur í senn. Gestir passa að mæta þvegnir og sprittaðir í bak og fyrir.
Þá eru búningsklefar ekki opnir fyrir gesti líkamsræktar og grímuskylda er á göngum og þar sem ekki er unnt að virða tveggja metra regluna. Hver og einn sótthreinsar samviskusamlega eftir sig þau tæki sem hann notar.
„Við treystum því að fólk virði þessar reglur og fylgi þeim í einu og öllu,“ segir á vefsíðunni.
