Landsbankinn flytur á Djúpavogi
Afgreiðsla Landsbankans á Djúpavogi hefur tekið til starfa í verslunar- og þjónustukjarnanum að Búlandi 1.
Þetta kemur fram á vefsíðu Landsbankans. Þar segir að Kjörbúðin, Íslandspóstur og Vínbúðin séu einnig til húsa að Búlandi 1. Afgreiðslutími bankans er óbreyttur og hraðbanki verður aðgengilegur á opnunartíma Kjörbúðarinnar.
Í tilkynningu bankans segir að sífellt fleiri nýti sér stafræna þjónstu bankans. Þar sem eldra húsnæði að Markarlandi 1 hafi verið orðið óþarflega stórt hafi verið ákveðið að flytja afgreiðsluna í hagkvæmari og hentugri húsakynni. Samhliða þessum breytingum lýkur samstarfi Landsbankans við Íslandspóst á Djúpavogi.
„Við tökum áfram vel á móti viðskiptavinum okkar á Djúpavogi þar sem veitt verður öll almenn gjaldkeraþjónusta, svo sem reiðufjárþjónusta, virkjun á rafrænum skilríkjum og fleira, auk þess sem starfsfólk mun sem fyrr aðstoða viðskiptavini við að nýta sér stafræna þjónustu bankans," segir í tilkynningunni.
