Hættustigi og rýmingu aflétt á Seyðisfirði
Hættustigi og þar með rýmingu vegna hættu á ofanflóðum á Seyðisfirði hefur verið aflétt. Óvissustigi á Austurlandi hefur einnig verið aflétt. Hlíðin í sunnanverðum firðinum þoldi álag síðustu daga vel og úr þeim hefur fengist dýrmæt reynsla.Þetta kemur fram í tilkynningu frá Veðurstofunni. Óvissustigi var lýst yfir á laugardagskvöld en mikið rigndi á sunnudag og svo aftur nú í nótt. Um 100 mans rýmdu heimili sín á Seyðisfirði í gær.
Þó nokkur ofanflóð féllu á sunnudag og fram á mánudag en eftir það eru engar fregnir um þau.
Á Seyðisfirði er uppsöfnuð úrkoma rúmlega 100 mm frá því á laugardag, sem er það mesta sem komið hefur frá skriðuhrinunni í desember. Mælingar í borholum í Neðri-Botnum sýndu nokkuð hraða hækkun á vatnsborði á sunnudag en nú hefur dregið úr henni. Mælingar á hreyfingu jarðlaga með alstöð og sjálfvirkum GPS stöðvum sýna enga markverða hreyfingu.
Í færslu Veðurstofunnar segir að það sé góðs viti að veðrið síðustu daga hafi ekki hafa valdið óstöðugleika í jarðlögum hlíðarinnar. Þess vegna er ekki reiknað með því að það þurfi að grípa til sambærilegra rýminga á Seyðisfirði nema úrkoma og leysing verði nokkru meiri en nú varð.
Mælitæki til þess að vakta aurskriðuhættu í hlíðinni, sem komið hefur verið fyrir á undanförnum vikum, reyndust vel.
