Grænt ljós á sumarhúsahverfi i Úlfsstaðaskógi
Umhverfis- og framkvæmdaráð Múlaþings hefur samþykkt að við gerð aðalskipulags Múlaþings verði tekið tillit til áforma um nýtt sumarhúsahverfi í Úlfsstaðaskógi.Þetta kemur fram á vefsíðu Múlaþings. Á fundi ráðsins í vikunni kom fram að fyrir liggur erindi dagsett 13.11.2019 sem varðar nýtt sumarhúsahverfi í Úlfsstaðaskógi.
„Fram kemur að óskað sé eftir því að tekið verði tillit til slíkra áforma við endurskoðun aðalskipulags sem þá var í farvatninu. Svæðið sem um ræðir er skilgreint sem landbúnaðarsvæði samkvæmt gildandi aðalskipulagi og ekki er í gildi deiliskipulag á svæðinu,“ segir í bókun frá fundinum.
„Umhverfis- og framkvæmdaráð samþykkir að við gerð aðalskipulags Múlaþings verði tekið tillit til áforma um nýtt sumarhúsahverfi í Úlfsstaðaskógi. Ráðið heimilar einnig að unnin verði sérstök breyting á aðalskipulagi samhliða gerð deiliskipulags, óski landeigandi eftir því,“ segir í samþykkt ráðsins.
„Málinu er vísað sveitarstjórnar Múlaþings til afgreiðslu hvað varðar aðalskipulag og til heimastjórnar Fljótsdalshéraðs til afgreiðslu hvað varðar deiliskipulag.“
