Góðar líkur á að Vopnafjarðarlína komist í gagnið í dag
Góðar líkur eru á að Vopnafjarðarlína komist í gagnið seinnipartinn í dag og þar með rafmagn til Vopnafjarðar. Varaaflstöð bæjarins hefur séð íbúum og fyrirtækjum fyrir rafmagni frá aðfararnótt sunnudagsins.„Já það eru allar líkur á því.Það hefur verið erfitt að komast að línunni til að gera við hana en mér skilst að þetta komist í lag í dag,“ segir Sara Elísabet Svansdóttir sveitarstjóri Vopnafjarðar.
Eins og fram hefur komið í fréttum hefur ekki þótt óhætt að gera við línuna hingað til vegna snjóflóðahættu á því svæði sem bilunin varð. Viðgerðamenn fóru með þyrlu á staðinn í dag.
Sem fyrr segir fór rafmagnið af aðfaranótt sunnudags og varaaflstöðin var komin í gang klukkutíma síðar.
„Varaaflstöðin er 6 MW og hún getur annað öllum Vopnafirði, uppsjávarvinnslunni á litlu álagi og bræðslunni ef þeir keyra olíuketilinn í stað rafskautaketils,“ segir Sara Elísabet. „Þannig að jú hún hefur dugað.“
Sara Elísabet segir að sveitarfélagið sé að breyta aðalskipulaginu á þá leið að háspennulínan yfir Hellisheiði verði tekin niður að hluta og staðinn settur strengur í jörð.
„Slíkt gæti til frambúðar komið í veg fyrir bilun af þessu tagi,“ segir hún.