Go-IoT hlýtur inngöngu í LoRa Alliance
Austfirska tæknifyrirtækið Go-IoT er orðinn fullgildur meðlimur að LoRa Alliance, samtökunum að baki LoRa WAN samskiptastaðlinum. Framkvæmdastjóri fyrirtækisins segir aðildina mikilvæga fyrir fyrirtækið til að koma sér á framfæri og hafa áhrif á þróun staðalsins.„Þetta eru samtök fyrirtækja sem standa að baki þráðlausum staðli sem er til samskipta við skynjara og fleiri tæki. LoRa WAN er í samkeppni við tæknina sem við þekkjum undir nafninu 5G.
Munurinn er hins vegar sá að LoRa Wan er langdræg tækni sem notar litla orku, hún getur farið í gegnum mörg lög af steypu í háhýsum sem venjuleg þráðlaus tækni gerir ekki og skynjararnir geta notast við batterí sem endast í 15-20 ár.
Gagnaflutningurinn er hægari, þú ert ekki að fara að horfa á myndband yfir LoRa Wan en staðallinn er nógu öflugur ef senda þarf 4-5 tölur sem sýna til dæmis hita, raka og magn koltvísýrings á 15 mínútna fresti. Þetta eru litlar en mikilvægar upplýsingar,“ segir Þröstur Jónsson, framkvæmdastjóri Go-IoT, sem þróað hefur tækni sem byggir á samskiptastaðlinum.
Loftgæði skoðuð í faraldrinum
Go-IoT hefur einkum einbeitt sér að þróun lausna fyrir byggingariðnaðinn, svo sem til að stýra hitastigi í byggingum og nú loftgæðum en áherslan á þau hefur aukist í Covid-faraldrinum eftir að sýnt var fram á hvernig veiran getur dreifst með lofti.
„Lengi vel var ekki hugsað mikið út í loftgæðin við byggingu húsa en þau reyndust mjög slæm, jafnvel á heimilum, þegar farið var að skoða málið. Til að mæla loftgæðin þarf skynjara og það getur verið mikið mál að bæta þeim við eftir á ef draga þarf í lagnir og slíkt. Þess vegna hafa menn frekar sett upp skynjara í hvert herbergi sem senda gögn frá sér í einn sameiginlegan þjón.
LoRa WAN hefur líka verið notuð til að fylgjast með kæli- og frystivörum sem verið er að flytja þar sem hitinn má ekki fara yfir ákveðið mark. Með þessari tækni má á ódýran hátt safna miklu magni upplýsinga sem ekki voru aðgengilegar áður vegna kostnaðar,“ útskýrir hann.
Einfaldari uppsetning og meira öryggi
Go-IoT framleiðir Dingo-vörulínuna. Áherslan þar hefur verið á móttakara sem taka við gögnum í gegnum LoRa WAN en fyrirtækið vinnur nú einnig að gerð skynjara sem væntanlegir eru á markað fyrri lok ársins.
„Venjulega eru gögnin send yfir í móttakara sem staðsettur er utan húss með að senda þau fyrst yfir netsamband í skýjaþjón. Á þessu er enginn staðall, hver gerir þetta með sínu móti.
Við sleppum hins vegar þjónustunni í skýinu en höfum móttakarann inni í byggingunni sem eykur öryggið og einfaldar. Við breytum líka LoRa-skynjurum yfir á BACnet, sem er ráðandi staðall í byggingastjórnunartækni. Með því sjást LoRa-skynjarar eins og hvert annað BACnet tæki og þar með verður auðveldara fyrir þá sem eru vanir að nota BACnet, sem eru þó nokkrir, að nota LoRa-skynjara.“
Tækifæri til markaðssetningar og hafa áhrif á þróunina
Þröstur segir það skipta Go-IoT töluverðu máli að hafa nú hlotið aðild að LoRa Alliance. „Það er töluvert mál að fá aðild því það þarf að sýna fram á trúverðugleika. Nú birtist Go-IoT á heimasíðu samtakanna sem eitt þeirra fyrirtækja sem styðja við tæknina og þar getum við miðlað frá okkur upplýsingum, en flestir sem eru að leita að LoRa-búnaði byrja á henni.
Við fáum líka aðgang að faghópum sem eru að þróa staðalinn og áhrif á hvað þar er í gangi. Aðildin felur því í sér tækifæri til markaðssetningar, að hafa áhrif á framþróunina og viðurkenningu.“
Rekstrarstöðvun í kjölfar skriðufallanna
Go-IoT er með fjóra fasta starfsmenn, tvo á Íslandi og tvo í Bretlandi. Starfsmennirnir hér starfa annars vegar á Egilsstöðum, hins vegar á Seyðisfirði. Fyrirtækið var eitt þeirra sem hafði aðsetur í Silfurhöllinni sem eyðilagðist í stóru skriðunni sem féll á Seyðisfjörð þann 18. desember. Það hefur haft töluverð áhrif á starfsemina. Sjö fyrirtæki með alls 12 starfsmönnum voru með starfsemi þar.
„Við töpuðum tölvubúnaði og ýmsu dóti. Við áttum afrit af öllum gögnum en stóra tjónið felst í rekstrarstöðvuninni, að starfsmaðurinn geti ekki áfram mætt á sína föstu skrifstofu til að vinna. Sú stöðvun stendur enn yfir og ég held að það hafi orðið mikil truflun á starfsemi allra þeirra fyrirtækja sem voru í Silfurhöllinni. Okkar starfsmaður hvarf fyrst frá störfum en hefur eiginlega verið á vergangi síðan, annað hvort komið í Egilsstaði eða setið heima.
Starfsstöðin á Seyðisfirði var mikilvæg fyrir okkar starfsemi. Þar var hálfgerð rannsóknarstofa sem við höfum ekki náð að koma upp aftur. Þetta kom líka á viðkæmum tíma, við vorum að ganga inn í LoRa Alliance.
Við veitum alþjóðlega þjónustu þar sem við getum ekki hringt í viðskiptavini okkar og sagt að við getum ekki þjónustað þá næstu tvo mánuðina því skrifstofan sé komin á kafi í firði á Íslandi. Það er ekki tekið gilt.“
