Fyrsti kolmunnafarmurinn á leið til Neskaupstaðar
Bjarni Ólafsson AK er á leiðinni til Neskaupstaðar með fyrsta kolmunnafarminn eftir að veiðar hófust nýverið á gráa svæðinu suður af Færeyjum.Þetta kemur fram á vefsíðu Síldarvinnslunnar. Á síðunni er rætt við Runólf Runólfsson skipstjóra sem upplýsir að skipið verði komið til hafnar um klukkan 11 í kvöld. Hann lætur vel af veiðinni.
„Það er í reynd búin að vera fínasta veiði og skipin voru að hífa gott í morgun. Það mun hins vegar vera einhver kaldaskítur á miðunum núna. Við erum með 1700 tonn sem fengust í þremur holum. Í hvert sinn var dregið í 14-19 tíma. Það er býsna þröngt á miðunum þarna og veiðin fer fram á takmörkuðu svæði. Þarna er íslenski flotinn og færeysk skip og auk þess einir 20 Rússar,“ segir Runólfur.
