Fólksfjölgun var yfir landsmeðaltali í Múlaþingi
Fólksfjölgun í Múlaþingi á síðasta ári var 2% sem er nokkuð yfir landsmeðaltalinu sem hljóðar upp á 1,3%. Hvað Austurland í heild varðar var fólksfjölgunin aðeins undir meðaltalinu eða 1%.Þetta kemur fram á vefsíðu Hagstofunnar. Þar segir að Íslendingar séu nú tæplega 369 þúsund talsins og fjölgaði þeim um tæplega 4.700 manns á síðasta ári.
Fram kemur að árið 2020 fækkaði íbúum í 27 af 69 sveitarfélögum landsins þar á meðal Fjarðabyggð þar sem íbúum fækkaði um 0.1%. Fækkunin var hlutfallslega mest í Reykhólahreppi eða 9,9%.
Af ellefu stærstu sveitarfélögunum með 5.000 íbúa eða fleiri fjölgaði hlutfallslega mest í Garðabæ (4,5%), Mosfellsbæ (4,2%) og Sveitarfélaginu Árborg (3,9%). Fjölgun var einnig yfir landsmeðaltali í Akraneskaupsstað (2,2%), Múlaþingi (2,0%) og Reykjavíkurborg (1,6%).
Fram kemur á vefsíðunni að hinn 1. desember 2020 breyttust mörk landshlutanna Austurlands og Suðurlands í landsvæðaskiptingu Hagstofu Íslands þannig að framvegis mun Sveitarfélagið Hornafjörður tilheyra Suðurlandi en ekki Austurlandi eins og áður.
